Երևանի քաղաքապետ Տարոն Մարգարյանի 2013թ. օգոստոսի 8-ի N 4024-Ա որոշումով Տիգրան Բարսեղյանը նշանակվել է Երևան քաղաքի գլխավոր ճարտարապետ: Այս մասին PanARMENIAN.Net-ը տեղեկանում է Երևանի քաղաքապետարանի տեղեկատվության և հասարակայնության հետ կապերի վարչությունից:
Տիգրան Բարսեղյանը Երևանի ճարտարապետության և շինարարության պետական համալսարանի ճարտարապետության ֆակուլտետի դեկանն է, ճարտարապետության թեկնածու, պրոֆեսոր: Մասնակցել է Ստեփանակերտի օդանավակայանի ուղևորային համալիրի նախագծմանը, Շուշի քաղաքի ազատագրման 15 ամյակին նվիրված հուշակոթողի նախագծին, Ակադեմիկոս Վ. Համբարձումյանի հուշարձան-կոթողի նախագծին, Լևոն Մադոյանին, Վաչե Հովսեփյանին և Ջիվան Գասպարյանին նվիրված հուշարձանախմբի նախագծին և այլ աշխատանքների:
Ավելի վաղ PanARMENIAN.Net-ը տեղեկացրել էր, որ Երևանի գլխավոր ճարտարապետ Նարեկ Սարգսյանը ազատվել է պաշտոնից: Նա նշանակվել է Հայաստանի Հանրապետության կառավարությանն առընթեր ճարտարապետության պետական կոմիտեի նախագահ: