15 սեպտեմբերի 2014 - 18:06 AMT
Ադրբեջանը կարող է սպառազինվել իսրայելյան «Երկաթե գմբեթ» համակարգերով

Բաքվում տեղի ունեցած ADEX-2014 սպառազինությունների ցուցահանդեսի շրջանակում բանակցություններ են տեղի ունեցել Իսրայելի պաշտպանության նախարար Մոշե Յաալոնի և Ադրբեջանի նախագահ Իլհամ Ալիևի միջև:

Ինչպես գրում է haqqin.az-ը իսրայելյան ԶԼՄ-ների վրա հղումով, իսրայելյան կողմը ցուցադրել է «Երկաթե գմբեթ» հակահրթիռային պաշտպանական համակարգերը: Բացի այդ նախագահի հետ բանակցություններից հետո խոհրդակցություններ են տեղի ունեցել մի քանի նախարարների հետ:

«Երկաթե գմբեթ»-ը 4-70 կմ հեռահարության չկառավարվող տակտիկական հրթիռներից պաշտպանվելու համար նախատեսված հակահրթիռային պաշտպանության տակտիկական համակարգ է։ Մշակված է իսրայելական Rafael Advanced Defense Systems ընկերության կողմից։ Սպառազինության ընդունման սկզբնաժամկետն էր 2011 թվականը։ Ամեն մարտկոցը կարող է պաշտպանել մոտավորապես 150 քառակուսի կիլոմետր տարածք:

Ցուցահանդեսին մասնակցել է 5 իսրայելյան ընկերություն: Իսրայելյան այլ զինատեսակների վերաբերյալ շահագրգռվածության մասին տեղեկատվություն չկա:

Ավելի վաղ Ադրբեջանն Իսրայելից գնել է 1,6 մլրդ դոլարի ռադիոլոկատորներ, անօդաչու սարքեր, հականավային հրթիռներ, ականազերծման համակարգեր ու հրաձգային զենք:

Ավելի վաղ Բաքուն նաև ՀՕՊ համակարգեր է գնել, մասնավորապես, Ռուսաստանից՝ C 300-«Ֆավորիտ», Բելառուսից՝ «Բուկ»- ՄԲ: Ադրբեջանը չի սահմանափակվում պաշտպանական զենքի գնումներով. վերջին մի քանի տարիներին ադրբեջանցիները գնել են հարյուրավոր տանկեր ու այլ զրահատեխնիկա, հրետանային համակարգեր, տասնյակ ուղղաթիռներ և ինքնաթիռներ, ինժեներական տեխնիկա, ականանետեր, հակատանկային տեխնիկա: Զենքի հիմնական մատակարարն Ադրբեջանին Ռուսաստանն է, խոշոր առաքումներ են իրականացնում նաև Ուկրաինան և Բելառուսը: