«Ադրբեջան կատարած իմ վերջին այցի ժամանակ ես կարեւորեցի մշակութային ժառանգության պահպանումը: Մենք դատապարտում ենք ադրբեջանական իշխանությունների կողմից Նախիջեւանի Հին Ջուղայի հայկական գերեզմանատան ավերումը»,-Երեւանում կայացած մամլո ասուլիսի ժամանակ հայտարարել է Շվեյցարիայի արտգործնախարար Միշըլին Կալմի Ռեյը: Նրա խոսքերով, այս կապակցությամբ Շվեյցարիան դիմել է ՅՈՒՆԵՍԿՕ: Շվեյցարիայի ԱԳՆ ղեկավարն ասել է, թե սեպտեմբերին տեղի կունենա մշակութային ժառանգության պահպանման ԵԽԽՎ հանձնաժողովի այցը: «Հայաստանն ու Շվեյցարիան տարբեր պատմություն ունեն, սակայն շատ ընդհանուր բան ունեն իրենց մշակույթում: Մեր երկրում բավականին ակտիվ հայկական համայնք կա, որը մեծ աշխատանք է տանում ծանոթացնելու համար Շվեյցարիայի բնակչությանը Հայաստանի մշակույթին եւ ավանդույթներին»,-ընդգծել է Միշըլին Կալմի Ռեյը: