Հռոմի պապ Ֆրանցիսկոս I-ը Թուրքիայում եռօրյա այցն ավարտելուց հետո Իտալիա վերադառնալու ճանապարհին ինքնաթիռում պատասխանել է իրեն ուղեկցող լրագրողների հարցերին` անդրադառնալով նաև հայ-թուրքական հարաբերություններին:

«Թուրքիայի կառավարությունը անցյալ տարի մի ժեստ արեց: Նախկին վարչապետ Էրդողանն ուղերձ (ցավակցական) հղեց: Որոշները դա շատ փոքր քայլ համարեցին: Չգիտեմ՝ փոքր էր, թե մեծ, բայց ամեն դեպքում կարծում եմ, որ դա ձեռքմեկնում էր»,- ասել է պապը` քայլը գնահատելով դրական:

«Ես կարող եմ ձեռքս քիչ կամ շատ մեկնել և սպասել, թե դիմացինս ինձ ինչ կասի: Իմ սրտի ցանկությունն է, որ հայ-թուրքական սահմանը բացվի: Այնքան լավ կլինի, որ այդ սահմանը բացվի: Ես գիտեմ, որ այդ տարածաշրջանում կան աշխարհաքաղաքական հարցեր, որոնք դժվարացնում են սահմանների բացումը, սակայն եկեք աղոթենք հանուն այն բանի, որ այս ժողովուրդների միջև փոխհամաձայնություն լինի: Պետք է օգնենք, որ այս իրավիճակը հարթվի: Ցանկանում եմ, որ գալիք տարին լինի թեկուզ և փոքր ժեստերի, բայց մերձեցմանն ուղղված քայլերի տարի»,- ասել է Ֆրանցիսկոս պապը, մեջբերում է Ermenihaber-ը:

Հռոմի Ֆրանցիսկոս պապը նոյեմբերի 28-ին Թուրքիայի առաջնորդների հետ հանդիպումներում կրոնական հանդուրժողականության և երկխոսություն սկսելու կոչ է արել` հակահարված տալու ծայրահեղականությանը Միջին Արևելքում: Ելույթ ունենալով Անկարայում՝ Ֆրանցիսկոս պապը բոլոր կրոնների հետևորդներին կոչ է արել հարգել մարդկային կյանքը, արժանապատվությունը և կրոնական ազատությունը:

Հռոմի պապն ընդգծել է, որ Թուրքիան «մեծ պատասխանատվություն» է կրում իր պատմության և արևելքն ու արևմուտքը կապող աշխարհագրական դիրքի պատճառով և կարող է օգնել միավորել տարբեր համայնքներ ու ճանապարհ բացել խաղաղության համար: