Վրաստանը վստահորեն շարունակում է եվրաինտեգրումն ու ձգտում է դեպի ՆՏԱՕ-ն, որը վրաց ժողովրդի ընտրությունն է, հայտարարել է Վրաստանի վարչապետ Իրակլի Ղարիբաշվիլին Հունգարիա կատարած այցի ժամանակ: Ինչպես հայտնում է «Ազատություն» ռադիոկայանը վարչապետի մամուլի ծառայության վրա հղումով, Իրակլի Ղարիբաշվիլին հանդիպել է Հունգարիայի վարչապետ Վիկտոր Օրբանի հետ:
Դռնփակ բանակցությունների ժամանակ քննարկվել են երկու երկրների փոխհարաբերությունների հիմնական հարցերը: Հատուկ ուշադրություն է դարձվել տնտեսական և առևտրային գործակցության խորացմանը: Անդրադարձ է եղել նաև Վրաստանի ինտեգրմանը Եվրամիությանը և այդ ուղղությամբ արձանագրված առաջընթացին:
Իրակլի Ղարիբաշվիլին շնորհակալություն է հայտնել հունգարացի գործընկերոջը Հունգարիայի մասնակցության համար Ուելսում ՆԱՏՕ-ի գագաթնաժողովում Վրաստանի ստացած «փաթեթի» իրականացման գործում:
Վիկտոր Օրբանը հաստատել է Հունգարիայի աջակցությունը Վրաստանի տարածքային ամբողջականությանն ու ինքնիշխանությանը: «Արևելյան գործընկերության» Ռիգայում կայացած գագաթնաժողովում Հունգարիան կողմ է լինելու Վրաստանի և ԵՄ միջև առանց մուտքի արտոնագրերի ռեժիմին, հայտարարել է Հունգարիայի վարչապետը:
