Շանհայի համագործակցության կազմակերպության (ՇՀԿ) ընդլայնման համար ոչ մի իրավաբանական խոչընդոտ չկա, նոր երկրների անդամակցումը միայն կբարձրացնի կազմակերպության հեղինակությունը միջազգային խնդիրների լուծման գործում, հայտարարել է ՇՀԿ գլխավոր քարտուղար Դմիտրի Մեզենցևը:
Այսօրվա դրությամբ ՇՀԿ անդամ երկրներն են ՌԴ-ն, Չինաստանը, Ղազախստանը, Ղրղզստանը, Տաջիկստանն ու Ուզբեկստանը: Դիտորդի կարգավիճակ ունեն Աֆղանստանը, Հնդկաստանը, Իրանը, Մոնղոլիան ու Պակիստանը: ՇՀԿ աշխատանքային խումբը քննում է Պակիստանի, Իրանի ու Հնդկաստանի լիիրավ անդամակցության հայտերը: Ադրբեջանը, Հայաստանը, Բանգլադեշը, Նեպալը, Սիրիան դիտորդի կարգավիճակի համար են դիմել:
«Դուշանբեի գագաթնաժողովում վեց երկրների ղեկավարները կարևոր փաստաթղթեր են ստորագրել, որով ավարտվեց կազմակերպության ընդլայնման նորմատիվային բազայի ձևավորումը: Ստորագրվել է տիպային հուշագիր հայտատու պետությանը ՇՀԿ լիիրավ անդամի կարգավիճակ տրամադրելու մասին: Երկրորդ կարևոր փաստաթուղթը ՇՀԿ նոր անդամների ընդունման կարգն է: Այսպիսով, այլևս ոչ մի իրավական խոչընդոտ չկա կազմակերպության ընդլայնման համար»,-հայտարարել է Մեզենցևը Պեկինում կայացած մամուլի ասուլիսում:
Մեզենցևը նշել է, որ այժմ «քննարկվում են նախկինում ներկայացված լիիրավ անդամակցության, ինչպես նաև դիտորդի ու «երկխոսության գործընկերոջ» կարգավիճակների վերաբերյալ հայտերը»,-հայտնում է ՌԻԱ Նովոստին:
«Մենք բոլորս կողջունենք կազմակերպության ընդլայնումը, ինչը կնպաստեր ՇՀԿ հեղինակության ու ազդեցության աճին տարածաշրջանում միջազգային օրակարգի հարցերի լուծման առումով»,-ասել է Մեզենցևը: Նա, սակայն, խորհուրդ է տվել «համբերել» ու սպասել որոշումներին, որոնք կընդունվեն ՇՀԿ հերթական գագաթնաժողովում: ՇՀԿ հաջորդ գագաթնաժողովը կայանալու է Ուֆայում ընթացիկ տարվա հուլիսի 8-10-ը:
Շանհայի համագործակցության կազմակերպության (ՇՀԿ) ընդլայնման գործարկումը կազմակերպությունում ՌԴ նախագահության առաջնահերթությունն է լինելու, հայտարարել է ՌԴ ԱԳ փոխնախարար Իգոր Մորգուլովը մարտի 11-ին Խանտի Մանսիյսկում ՇՀԿ 10-րդ նստաշրջանի բացմանը: 2014-ի սեպտեմբերից ՇՀԿ-ում նախագահում է Ռուսաստանը:
Դեռ 1996 թվականից սկսած՝ գործում էր Շանհայի հնգյակը (Չինաստան, Ռուսաստան, Ղազախստան, Ղրղզստան և Տաջիկստան): 2001 թվականին Հնգյակին միացավ նաև Ուզբեկստանը, և կազմակերպությունը վերանվանվեց Շանհայի համագործակցության կազմակերպություն: ՉԺՀ Շանհայ քաղաքում հիմնված կազմակերպության շտաբ-կայանը Պեկինում է: Կազմակերպությունը մեծ հաջողություններ գրանցեց անդամ երկրների միջև սահմանային խնդիրների կարգավորման, անվտանգության և սահմանամերձ շրջաններում ռազմական ուժերի նվազեցման ասպարեզում: Կազմակերպությունը հետագայում ընդլայնեց իր գործունեությունը, և ներկայումս անդամ երկրների միջև համագործակցությունն ընդգրկում է նաև ոազմական, տնտեսական և մշակութային բնագավառները: 2013-ի ապրիլին Թուրքիան Շանհայի համագործակցության կազմակերպության (ՇՀԼ) «երկխոսության գորընկերոջ» կարգավիճակ ստացավ:
Դիտորդի կարգավիճակ ունեն Հնդկաստանը, Իրանը, Մոնղոլիան և Պակիստանը: «Երկխոսության գորըծնկեր» են Բելառսուը և Շրի Լանկան:
