ԵԱՀԿ Մինսկի խմբի ամերիկացի համանախագահ Ջեյմս Ուորլիքը հունիսի 9-ին ժամանել է Երևան: Այս մասին նա գրել է Twitter-ի իր միկրոբլոգում:
«Ես կրկին Երևանում եմ և անհամբեր սպասում եմ այսօրվա և վաղվա հանդիպումներին՝ քննարկելու համար ղարաբաղյան կարգավորումը»,- գրել է Ուորլիքը՝ համադրելով իր գրությունը Հանրապետության հրապարակի լուսանկարով:
Նույն օրը նա հանդիպել է ԱԺ պատգամավորներին: Հանդիպմանը ներկա են եղել ՀՀԿ-ական Սամվել Ֆարմանյանը, անկախ պատգամավոր Էդմոն Մարուքյանն ու Թևան Պողոսյանը «Ժառանգությունից»: Այսօր՝ հունիսի 10-ին, սպասվում է համանախագահի ու ՀՀ ԱԳ նախարարի հանդիպումը:
Ադրբեջանական ԶԼՄ-ները Բաքվում ԱՄՆ դեսպանատն վրա հղումով հայտնում են, որ ամերիկացի համանախագահը ներկա կլինի Եվրոպական խաղերի բացմանը Բաքվում: Արարողությանը ներկա գտնվելու հրավեր է ուղարկվել ԵԱՀԿ բոլոր համանախագահներին:
Ադրբեջանում Ֆրանսիայի դեսպանը հաստատել է, որ ֆրանսիացի համանախագահ Պիեռ Անդրիեն նույնպես ներկա կգտնվի արարողությանը: