Ղարաբաղյան հակամարտության կարգավորման թեմային են անդրադարձել Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևը հունիսի 13-ին Բաքվում, լրագրողներին է հայտնել ՌԴ նախագահի մամուլի քարտուղար Դմիտրի Պեսկովը:
«Հիմնականում քննարկվել են երկկողմ ռուս-ադրբեջանական հարաբերությունները: Դրանք բազմակողմ են և բազմաշերտ, մեր հարաբերությունների բոլոր ուղղությունները մանրամասն քննարկվել են: Անդրադարձ է եղել նաև ղարաբաղյան թեմային»,-ասել է Պեսկովը, հայտնում է ՌԻԱ Նովոստի գործակալությունը:
Վլադիմիր Պուտինն այցելել էր Բաքու ներկա գտնվելու համար առաջին Եվրոպական խաղերի բացմանը: Խաղերին մասնակցում են նաև Հայաստանը ներկայացնող մարզիկները:
Ավելի վաղ ԵԱՀԿ Մինսկի խմբի ամերիկացի համանախագահ Ջեյմս Ուորլիքը հայտարարեց, որ Հայաստանի մասնակցությունն Բաքվում ընթացող առաջին Եվրոպական մարզական խաղերին կողմերի համար գործակցության ու փոխըմբռնման կամուրջ կառուցելու հնարավորություն է սպորտում: Նա հուսով է, որ խաղերի հետագա ընթացքում օլիմպիական խաղերին հարիր մարզական ոգին, փոխադարձ հարգանքն ու բարեկամությունն ապահովված կլինեն:
«Մենք խրախուսում ենք նման շփումները՝ հիմքեր նախապատրաստելու մի ապագայի համար, որտեղ հայերն ու ադրբեջանցիները կկարողանան կրկին կողք-կողքի ապրել»,- Ուորլիքի խոսքերը մեջբերերել է Panorama.am-ը:
