Ադրբեջանի արտգործնախարար Էլմար Մամեդյարովը սպասում է, որ Փարիզում Հայաստանի ԱԳՆ ղեկավար Վարդան Օսկանյանի հետ կայանալիք հանդիպման ժամանակ կողմերը հնարավորություն կունենան շփման կետեր գտնել Լեռնային Ղարաբաղի հակամարտության կարգավորման առավել բարդ հարցերում: «Այս համատեքստում Մոսկվայում կայացած հանդիպումը եւս օգտակար էր: Սակայն արտահայտություն կա «սատանան միշտ մանրամասներում է գտնվում», եւ երբ անցնում ես «մանրամասներին», հանկարծ հասկանում ես, որ շատ խնդիրներ կան: Ես չեմ պատրաստվում չափազանց լավատես լինել, միեւնույն ժամանակ ցանկանում եմ իրական գնահատել գոյություն ունեցող իրավիճակը: Նոր տարրեր են հայտնվել, որոնք կարելի է օգտագործել, նոր գաղափարներ, որոնք ներմուծվել են համանախագահողների կողմից, եւ տվյալ համատեքստում այդ գաղափարների վրա աշխատելու նոր դաշտ է հայտնվել»,- նշել է Էլմար Մամեդյարովը:

Պատասխանելով այն հարցին, «թե ինչու են մինչեւ հիմա բացակայում այդ «շփման կետերը»»` Ադրբեջանի արտաքին քաղաքականության գերատեսչության ղեկավարը հայտարարել է. «Հնարավորությունների տանջալի փնտրտուք է ընթանում: Անհրաժեշտ է նուրբ հավասարակշռվածություն գտնել, դիրքերը մերձեցնելու համար: Բեւեռային, հակառակ կարծիքների գոյության դեպքում դրանք պետք է մոտեցնել. դա շատ բարդ եւ տքնաջան գործընթաց է` հաշվի առնելով` որքան նուրբ է Լեռնային Ղարաբաղի հարցը ինչպես մեր, այնպես էլ Հայաստանի համար: Եւ այդ համատեքստում մեր խնդիրն իհարկե դիրքորշումների մերձեցումն է: Կստացվի դա, թե` ոչ. ասելը շատ բարդ է, եւ ես չեմ ցանկանում, եւ, ամենայն հավանականությամբ, չեմ էլ կարող շատ հեռու ապագան տեսնել: Սակայն, այն, որ մեր կողմից կա այդ ցանկությունը, անկասկած է: Այժմ ամեն ինչ այնքան նուրբ է, որ ես չէի շտապի ասել, թե որեւէ առաջխաղաղցում կլինի: Իմ սկզբունքային դիրքորոշումը կայանում է նրանում, որ եթե հարցը կարգավորելու ցանկություն կա, ապա պետք է մինչեւ վերջ գնալ», հայտնում է «Թրենդը»: