«Ադրբեջանը Լեռնային Ղարաբաղի հայերին իր քաղաքացիներ է համարում, եւ հանրապետության կառավարությունը շահագրգռված է այդ տարածաշրջանի ապագա զարգացման մեջ, որը հանդիսանում է երկրի անբաժան մասը»,- հայտարարել է Ադրբեջանի արտգործնախարար Էլմար Մամեդյարովը ԵԱՀԿ-ում Իտալիայի մշտական ներկայացուցիչ Ֆրանչեսկո Բասկոնեի հետ հանդիպման ժամանակ Բաքվում: Ադրբեջանցի նախարարը ընդգծել է, որ Լեռնային Ղարաբաղի հակամարտության կարգավորումը հնարավոր է «միայն Ադրբեջանի տարածքային ամբողջականության շրջանակներում` տարածաշրջանի հայկական բնակչությանն ինքնիշխանության բարձրագույն կարգավիճակ տրամադրելով»: Է. Մամեդյարովը նշել է «Լեռնային Ղարաբաղում հայ եւ ադրբեջանական համայնքների խաղաղ գոյակցության ապահովման կարեւորությունը»: Իր հերթին, Ֆ. Բասկոնեն, նշելով Ղարաբաղյան հակամարտության կողմերի միջեւ համաձայնության հասնելու անհրաժեշտությունը` կարգավորման հիմնական սկզբունքների շուրջ, ընդգծեց հետհակամարտական ժամանակաշրջանում միջոցների կիրառման կարեւորությունը` կողմերի միջեւ փոխադարձ վստահություն ստեղծելու համար, հայտնում է Day.az-ը: