Գերմանիայի խորհրդարանը (Բունդեսթագը) արտոնել է գերմանացի զինծառայողների մասնակցությունը «Իսլամական պետություն» ահաբեկչական խմբավորման դեմ գործողությանը Սիրիայում, հայտնում է ՏԱՍՍ-ը: Կողմ է քվեարկել 445 պատգամավոր, դեմ` 146, 7-ը ձեռնպահ է մնացել:
Օրինագիծը հավանությայն է արժանացել առաջին հերթին ՔԴՄ/ՔՍՄ իշխող կոալիցիայի պատգամավորների շնորհիվ: Հիմնականում դեմ է եղել ընդդիմադիր Ձախակողմյան կուսակցության խմբակցությունն ամբողջ կազմով: «Կանաչների» մեծամասնությունը նույնպես դեմ է քվեարկել:
Դեկտեմբերի 1-ին Գերմանիայի նախարարների կաբինետը հաստատեց ԳԴՀ զինված ուժերի մասնակցությունը ԻՊ դեմ պայքարին: Սիրիայում և Իրաքում գործողություններին կարող է մասնակցել 1,2 հազար զինծառայող, առաքելությունը սահմանափակված է 1 տարի ժամկետով, սակայն կարող է երկարացվել:
Բացի այդ, Բեռլինը պատրաստ է մեկ ռազմանավ տրամադրել, լիցքավորող ինքնաթիռներ և մատակարարել դաշնակիցներին արբանյակներից ստացվող հետախուզական տվյալներով:
Գերմանիայի պաշտպանության նախարար Ուրսուլա դեր Լյաենը բացառել է Սիրիայի նախագահ Բաշար Ասադի բանակի հետ գործակցության հնարավորությունը:
Ավելի վաղ Գերմանիայի կանցլեր Անգելա Մերկելը հայտարարել էր, որ պատրաստ է համակողմանի աջակցություն ցուցաբերել Փարիզին ահաբեկչության դեմ պայքարում, այդ թվում` ռազմական օգնության տեսքով:
2014-ի ամռան սկզբին «Իսլամական պետության» զինյալները գրավեցին մի շարք բնակավայրեր Սիրիայի արևելքում և սկսեցին առաջանալ դեպի Իրաքի սահմանները: Հուլիսի վերջում նրանք հայտարարեցին Իրաքի ու Սիրիայի տարածքում խալիֆայության ստեղծման մասին: Գրոհայինները զանգվածային մահապատիժներ են իրականացնում Իրաքի բանակի զինծառայողների ու բնակիչների շրջանում գրավյալ տարածքներում: Մարտական գործողություններն ուղեկցվում են զանգվածային բնաջնջմամբ: Ըստ արևմտյան երկրների ԶԼՄ-ների, հակամարտության գոտում արդեն մոտ 10 հազար քրիստոնյա ու եզդի է սպանվել:
2015-ի սեպտեմբերի 30-ից Ռուսաստանը Սիրիայի նախագահ Բաշար Ասադի խնդրանքով կետային ավիահարվածներ է հասցնում ԻՊ գրոհայինների դիրքերին Սիրիայում` Սու-25 կործանիչների, ինչպես նաև ՍՈւ-24Մ և ՍՈւ-34-ի կիրառմամբ: Ըստ ՌԴ ՊՆ, ռուսական ավիացիան արդեն զգալի վնաս է հասցրել գրոհայինների կառավարման համակարգին և նյութատեխնիկական ապահովմանը, ինչպես նաև մահապարտ ահաբեկիչների պատրաստման ենթակառուցվածքներին:
