Իրաքյան Մոսուլը մինչ օրս ազատագրված չէ «Իսլամական պետության» գրոհայիններից, քանի որ գրոհի մասնակիցները չեն կարողանում համաձայնեցնել իրենց գործողությունները, ինչպես նաև այն վեճերի պատճառով, թե ով ինչ է ստանալու քաղաքի ազատագրումից հետո: Այդ մասին հայտարարել է Մոսկվայում իրաքյան Քրդստանի պաշտոնական ներկայացուցիչ Ասո Թալաբանին, հայտնում է ՌԻԱ Նովոստին:

«Մոսուլի ազատագրման մասին արդեն մեկ տարի է, ինչ խոսում են, բայց հաջողությունները շատ համեստ են: Բանն այն չէ, որ ուժերը չեն բավականացնում: Հարցն այն, է, որ գործողությանը միայն Իրաքը չէ, որ մասնակցում է: Մասնակցում են իրաքյան քրդերը, ամերիկացիները, Իրանը, Թուրքիան: Հավանաբար, նրանք դեռ չեն պայմանավորվել, թե ով և ինչպես է գործելու այդ ազատագրման ժամանակ»,-համարում է Թալաբանին:

Ըստ նրա, կողմերը նաև որոշում են, «թե ով որ շրջաններն է վերահսկելու Մոսուլում ազատագրումից հետո»: «Որքան էլ տարօրինակ լինի, այդ մասին ավելի բարդ է պայմանավորվել, քան ազատագրել Մոսուլը: Բուն գործողությունն այդքան բարդ չի լինի»,-գտնում է նա: Մասնավորապես, Թալաբանին նշել է, որ պարզ չէ, թե որն է լինելու Թուրքիայի դերը Մոսուլի ազատագրման գործում: «Սակայն Թուրքիան ակնհայտորեն պատրաստվում է ինչ-որ դեր ստանձնել: Թուրքական բանակի ներխուժումն իրաքյան Քրդստան 2014-ի դեկտեմբերին կապված է Մոսուլի ազատագրման գործողության հետ: Հավանաբար, դրանից հետո Թուրքիան մտադիր է ինչ-որ տարածք զավթել: Անշուշտ, Իրաքը դա չի ուզում»,-հավելել է իրաքյան Քրդստանի ներկայացուցիչը:

2014-ի ամռան սկզբին «Իսլամական պետության» զինյալները գրավեցին մի շարք բնակավայրեր Սիրիայի արևելքում և սկսեցին առաջանալ դեպի Իրաքի սահմանները: Ծայրահեղականները հաջողության են հասել նաև իրաքյան տարածքներում՝ վերահսկողություն սահմանելով երկրի արևմուտքում մի քանի քաղաքների վրա: Հուլիսի վերջում նրանք հայտարարեցին Իրաքի ու Սիրիայի տարածքում խալիֆայության ստեղծման մասին:

Մոսուլի զավթումից ի վեր ԻՊ գրոհայիններն ավելի քան 800 կին են սպանել: «Իսլամական պետության» գրոհայիններն առնվազն 80 մարդ են գնդակահարել իրաքյան Մոսուլի արվարձանում` ներառյալ իրավակարգի աշխատակիցների: Մարտի 5-ին ԱՄՆ գլխավորած կոալիցիայի գծով ԱՄՆ նախագահի հատուկ ներկայացուցիչ Բրետ Մաքգերակը հայտարարեց իրաքյան Մոսուլի ազատագրման գործողության մեկնարկի մասին: