Հայկական արտաֆրության «Արմֆոն» հեռախոսներն ու «Արմթաբ» պլանշետները կհայտնվեն շուկայում ապրիլին:

Հայկական արտադրության հեռախոսների հիշողությունը փոքր է, էկրանի ապակին էլ ամենաբարձր որակինը չէ: Մնացած առումներով արտադրողի՝ «Թեքնոլոջի ընդ Սայընս Դայնամիքս» ընկերության ղեկավարի ներկայացմամբ, ոչնչով չեն զիջում շուկայում առկա նմանատիպ հեռախոսներին: Իսկ այլ հավասար պայմաններում գինն անհամեմատ ցածր է:

Այն առայժմ մեծ ճանաչում կամ սպառման մեծածավալ պատվերներ չունի, հայտնում է ՀՀ հանրային հեռուստաընկերության կայքէջը:

2013-ի ավարտին հայտնի դարձավ, որ Հայաստանի ՏՏ ոլորտում գործող հայ-ամերիկյան Technology and Science Dynamics Inc./Armtab Technologies ընկերությունը Հայաստանում առաջին հայկական պլանշետների արտադրություն է նախաձեռնել: Արտադրության շրջանակում արդեն կան Android համակարգով փորձնական հավաքված պլանշետներ՝ 7.85, 9, 9.7 և 10.1 դյույմանոց էկրանով, 3G և WiFi հնարավորություններով, ինչպես նաև առաջին հայկական հեռախոսը՝ Արմֆոն (Armphone):

Պլանշետների ծրագրային և սարքային ապահովման (software և hardware) դիզայնն արվում է Հայաստանում, իսկ հավաքվում ԱՄՆ–ում և Հոնկոնգում: Երկրի ներքին շուկայում ու տարբեր ոլորտներում այդ պլանշետների կիրառումից բացի միջազգային շուկա դրանց արտահանումը կազմակերպելու հեռանկարներ կան: Սկզբնական փուլում նախատեսում են ամսական 30–50 հազար պլանշետ արտադրել, այնուհետև ամեն ինչ կախված կլինի պահանջարկից։