Հունիսի 2-ին զինյալ ահաբեկչական խմբավորումները հրթիռակոծել են Հալեպի հայաբնակ Նոր գյուղ թաղամասը` ավելի քան 30 հրթիռ է արձակվել: «Զվարթնոց» եկեղեցու շրջակայքում ընկած հրթիռը հրկիզել է հայ արհեստավորի արհեստանոցը։ Զոհվել է 3 հայ, որոնց ածխացած դիակները տեղափոխվել են հիվանդանոց, ասվում է Հալեպի «Գանձասար» թերթի ֆեյսբուքյան էջում:
Քիչ անց մահացել է նաև Նոր գյուղում վիրավորված ևս մեկ սիրիահայ: Ավելի ուշ հայտնի դաձան զոհված հայերի անունները. Վազգեն Ճապաղջուրյան, Լևոն Քելխաչերյան, Հովսեփ Ջանեցյան, Խաչիկ Աբուլաբության։
Նման միջադեպերը վերջին շրջանում Հալեպում ավելի հաճախակի են դարձել։
Վերջին շրջանում Հալեպը գնդակոծվում է ականանետերից և հրթիռային կայանքներից: Ավելի քան 100 խաղաղ բնակիչ է զոհվել: Ավելի վաղ հայտնի դարձավ, որ «Ջեբհաթ ան Նուսրա» ահաբեկչական խմբավորման զինյալներն ու նրանց դաշնակիցները մեծ գրոհ են սկսել Հալեպի ուղղությամբ: Գրոհից առաջ ահաբեկիչները գնդակոծել են Հալեպի «Դաբիթ» հիվանդանոցը: Զոհվել են տասնյակ մարդիկ, կան նաև մեծ թվով վիրավորներ:
