Հայաստանի պաշտոնական պատվիրակությունը մեկնել է Վան Աղթամար կղզու Սուրբ Խաչ նորոգված եկեղեցու բացման արարողությանը մասնակցելու նպատակով: Ինչպես PanARMENIAN.Net-ի թղթակցին են հաղորդել ՀՀ մշակույթի եւ երիտասարդության հարցերի նախարարությունում, պատվիրակությունը կգլխավորի մշակույթի նախարարի պաշտոնակատարի տեղակալ Գագիկ Գյուրջյանը: Պատվիրակության կազմում են ՀՀ ԳԱԱ ճարտարապետության ինստիտուտի տնօրեն Մկրտիչ Մուրադյանը, ՀՀ ԳԱԱ արեւելագիտության ինստիտուտի տնօրեն Ռուբեն Սաֆրաստյանը, ՀՀ կառավարությանը կից պատմական հուշարձանների պահպանման վարչության պետ Արտեմ Գրիգորյանը: Եկեղեցու բացումը տեղի կունենա մարտի 29-ին: Հայ Առաքելական եկեղեցու Սուրբ Աթոռ Մայր Էջմիածնի եւ Մեծի Տանն Կիլիկիո կաթողիկոսությունների ներկայացուցիչները հրաժարվել են մասնակցել արարողությանը, քանի որ Սբ.Խաչ եկեղեցին գործելու է որպես թանգարան, այլ ոչ թե որպես գործող եկեղեցի: