Մոսկվան կտեղեկացնի ԵԱՀԿ Մինսկի խմբի համանախագահ երկրների ներկայացուցիչներին Սանկտ Պետերբուրգում Հայաստանի նախագահ Սերժ Սարգսյանի և Ադրբեջանի նախագահ Իլհամ Ալիևի հետ ՌԴ նախագահ Վլադիմիր Պուտինի հանդիպման արդյունքների մասին: ՌԴ-ն նաև իր տեսակետը կներկայացնի հարաբերությունների բոլոր խնդիրների վերաբերյալ` ՆԱՏՕ-ի ընդլայնումից մինչև ուկրաինական հակամարտություն:
Եռակողմ խորհրդակցության առանձին նստաշրջանը նվիրված կլինի հակամարտություններին ԵԱՀԿ տարածքում և դրանց ազդեցությանը տարածաշրջանի անվտանգության վրա:
Առավել խնդրահարույց խնդիրների հարցում կազմակերպությունն առանձնացնում է ղարաբաղյան հակամարտությունը: Ընդ որում ԵԱՀԿ-ում նշում են «զգուշավոր դրական միտումը», որը նախանշվել է Ադրբեջանի և Հայաստանի նախագահների Վիեննայի և Սանկտ Պետերբուրգի հանդիպումներից հետո: Առանձին նիստ կնվիրվի նաև Ուկրաինային:
Ավելի վաղ հայտնի դարձավ, որ ԵԱՀԿ գործող նախագահ, Գերմանիայի արտգործնախարար Ֆրանկ Վալտեր Շտայնմայերը հունիսի 29-ին երկօրյա այցով կժամանի Հայաստան:
Հունիսի 20-ին Սանկտ Պետերբուրգում տեղի է ունեցել ՀՀ, ՌԴ և ԱՀ նախագահներ Սերժ Սարգսյանի, Վլադիմիր Պուտինի ու Իլհամ Ալիևի եռակողմ հանդիպումը: Դրա արդյունքներով կողմերն ընդունել են հայտարարություն, որում, մասնավորապես, նշվում է. «ՀՀ և ԱՀ նախագահները հաստատեցին ղարաբաղյան հակամարտության գոտում իրավիճակի կայունացմանն ուղղված մայիսի 16-ին Վիենայում տեղի ունեցած վեհաժողովի պայմանավորվածությունների կատարումը: Այդ նպատակով, նրանք, մասնավորապես, պայմանավորվել են ավելացնել միջազգային դիտորդների քանակը հակամարտության գոտում: Նրանք գոհունակություն արտահայտեցին շփման գծում վերջին ժամանակաշրջանում հրադադարի ռեժիմի պահպանման կապակցությամբ»:
