«Մանչեսթեր Յունայթեդի» գլխավոր մարզիչ Ժոզե Մոուրինյոն բացատրել է, թե ինչու թիմի նորեկ, հայ կիսապաշտպան Հենրիխ Մխիթարյանը չի ընդգրկվել վերջին երկու խաղերի մեկնարկային կազմում, հայտնում է «Նովոստի Արմենիան» manutd.ru-ի վրա հղումով։

Պատասխանելով այն հարցին, թե ինչու նա ընտրությունը չի կատարել հայ կիսապաշտպանի օգտին առաջին պաշտոնական խաղերում` մարզիչն ասել է. «Ամբողջ հարցը տարբերակներն են։ Ես պատրաստվում էի «Լեսթերի» հետ խաղին և զգում, որ մեզ պետք է Ջեսի Լինգարդի արագությունը։ Իսկ «Բորնմութի» հետ խաղում որոշեցի, որ Խուան Մատան կկարողանա դիմակայել հակառակորդի բարձր ճնշմանը»։

Մոուրինյոյի խոսքով, Մատան կարող էր օգտագործել ճնշման գծից այն կողմ գտնվող ազատ գոտիները, և շատ օգտակար եղավ: «Ես որոշեցի, որ երկու խաղերում էլ Ռունին մոտ կխաղա Իբրահիմովիչին, և Միկիին չդրեցի հիմնական կազմում։ Երբ որոշ մարզիչներ խաղացողներ են գնում, նրանք զգում են, որ պետք է պաշտպանեն իրենց որոշումը` ամբողջ ժամանակը նորեկին տալով, բայց ես դրանցից չեմ։ Թիմն ավելի կարևոր է իմ շահերից, և ես անում եմ այնպես, որ ավելի լավ լինի թիմի համար»,– ընդգծել է «Մանչեսթեր Յունայթեդի» մարզիչը։

«Ես զգում էի, որ Լինգարդն ու Մատան թիմի համար այդ խաղերում լավագույնը կլինեն, և ես որոշում ընդունեցի` հաշվի առնելով Պրեմիեր Լիգայի իրողությունները։ Այնուամենայնիվ, շարունակում եմ ասել այն, ինչ ասել եմ ավելի վաղ` Մխիթարյանը սուպերֆուտբոլիստ է, և նա մեզ այս խաղաշրջանում շատ բան կտա»,-հավելել է նա։

Հուլիսի 6-ին «Մանչեսթեր Յունայթեդը» պաշտոնապես ներկայացրել է Հայաստանի հավաքականի կիսապաշտպան Հենրիխ Մխիթարյանին որպես ակումբի նոր խաղացող: «Հպարտ եմ միանալ «Մանչեսթեր Յունայթեդին», իմ երազանքն իրականացավ: Ոգևորված եմ, որ հանդես եմ գալու նման հարուստ պատմությամբ ակումբում, հույս ունեմ, եր երկար եմ նրա մասը կազմելու: Շնորհակալ եմ Ժոզե Մոուրինյոյին և ակումբին ինձ ընտրելու համար», - ասել է Մխիթարյանը: «Մանչեսթեր Յունայթեդը» €42 մլն է վճարել Մխիթարյանի համար, ինչպես նաև €8 մլն կվճարի ֆուտբոլիստին` որպես միանվագ բոնուս: Բացի այդ, Մխիթարյանի տարեկան աշխատավարձը «Մանչեսթեր Յունայթեդում» կկազմի €12.5 մլն: Պայմանագիրը կնքվել է 4 տարով: Այդպիսով, Մխիթարյանը շաբաթական մոտ £200 000 կստանա:

Մխիթարյանը դարձել է հետխորհրդային տարածքի ամենաթանկարժեք ֆուտբոլիստը: Նախկինում այդ կարգավիճակն ուներ ուկրաինացի հարձակվող Անդրեյ Շևչենկոն, որը 2006-ին տեղափոխվեց անգլիական «Չելսի» իտալական «Միլանից» 40 մլն եվրոյով:

Ընթերցեք նաև. Մխիթարյանն իր առաջին գնդակը «Մանչեսթեր Յունայթեդի» կազմում խփել է «Բորուսիայի» դարպասը (վիդեո)