ՀՀ վերաքննիչ քրեական դատարանը մերժել է «Սասնա ծռեր» խմբի անդամ Արամ Մանուկյանի պաշտպանների բողոքը՝ նրա նկատմամբ կիրառված խափանման միջոցի՝ կալանքի դեմ:
«Մենք բողոքարկել էինք Արաբկիր և Քանաքեռ Զեյթուն վարչական շրջանների ընդհանուր իրավասության դատարանի որոշումը, ինչը Վերաքննիչն այսօր մերժեց»,- հայտարարել է Արամ Մանուկյանի փաստաբան Հարություն Բաղդասարյանը,-հայտնում է Aysor.am-ը:
Նրա խոսքով՝ դատարանի որոշման մեջ հիմնավորված չէ, թե ազատության մեջ մնալու դեպքում իր պաշտպանյալն ինչպես է խուսափելու քննությունից:
Հարություն Բաղդասարյանը փոխանցել է, որ Արամ Մանուկյանը չի մասնակցել դատական նիստին։
Արամ Մանուկյանին մեղադրանք է առաջադրվել ՀՀ քրեական օրենսգրքի 219-րդ հոդվածի 3-րդ մասով և 235-րդ հոդվածով (Շենք շինությունների, հաղորդակցության ու տրանսպորտի միջոցների գրավում կազմակերպված խմբի կողմից և ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):
