Սիրիացի ապստամբները, որոնց աջակցում է Թուրքիան, փորձել են ճեղքել Հալեպի արևելյան մասի շրջափակումը, որն իրականացնում են կառավարական ուժերը, գրում է «Կոմերսանտը» AFP-ի վրա հղումով:
Ջոկատները գնդակոծում են Ասադին հավատարիմ զորքերի դիրքերը հարավ-արևմուտքում: Հայտնի է 15 խաղաղ բնակչի մահվան մասին: Ավելի քան 100 մարդ վիրավորվել է:
Հարձակումից առաջ ապստամբները 3 զրահամեքենա են պայթեցրել: Շարունակվում են հարձակումները կառավարական զինվորական ուսումնարանների և քրիստոնեական թաղամասեի վրա, հրթիռակոծվում է Համադանիա թաղամասը:
Ըստ Սիրիայի կառավարական ուժերի, արևելյան Հալեպում առնվազն 8.000 զինյալ կա, որոնցից շատերը ահաբեկչական «Ահրար աշ Շամ», «Ջեյշ ալ Ֆաթհ» և «Ջամահաթ ուլ Մուջոհիդին» խմբավորումների անդամ են:
Հոկտեմբերի 27-ին հայտնի դարձավ, որ ահաբեկիչները կրակ են բացել «Գրադ» համազարկային հրթիռային համակարգերից: Գրոհայինները հրթիռակոծել են բանակի դիրքերը Բազո ռազմավարական բարձունքում, ՀՕՊ ստորաբաժանումներն ու բջջային կապի աշտարակները: Հրթիռակոծվում են նաև կամավորների և կառավարական զորքերի դիրքերը ուսումնարանների շրջանում և 1070 թաղամասում: Քաղաքում չի գործում բջջային կապն ու ինտերնետը:
Հոկտեմբերի 23-ին կառավարական զորքերը հարձակման էին անցել Հալեպի հարավում եռօրյա հումանիտար դադարի ավարտից հետո, որի ընթացքում խաղաղ բնակիչներն ու զինյալները կարող էին հեռանալ քաղաքից: Ահաբեկիչները հրաժարվել են հեռանալ քաղաքից և սպառնալիքներով թույլ չեն տվել դա անել նաև խաղաղ բնակիչներին:
2011-ի մարտից շարունակվող քաղաքացիական պատերազմի հետևանքով Սիրիայում ավելի քան 220.000 մարդ է զոհվել: