ՀՀ-ն և ՌԴ-ն փոքր և միջին ձեռնարկատիրությունների համատեղ նախագծերի ճանապարհային քարտեզ կմշակեն: Այս մասին ասվել է նոյեմբերի 22-ին ՀՀ տնտեսական զարգացման և ներդրումների նախարարությունում նախարար Սուրեն Կարայանի և ՌԴ արդյունաբերության և առևտրի նախարար Դենիս Մանտուրովի հանդիպմանը:
Սուրեն Կարայանը նշել է, որ նախարարությունը հետամուտ է լինելու վարչապետի հետ ավելի վաղ հանդիպման ժամանակ ձեռք բերված համաձայնությունների իրագործմանը: Նրա խոսքով, ապրանքների արտահանումը դեպի երրորդ երկրներ երկու երկրի համար կարող է արդյունաբերության զարգացման լավ ուղղություն դառնալ:
Իր հերթին Ռուսաստանի արդյունաբերության և առևտրի նախարար Դենիս Մանտուրովը ևս խոսել է երրորդ երկրներ արտահանման հնարավորությունների մասին և այս համատեքստում կարևորել գործարարների համար անհրաժեշտ պայմանների ապահովումը:
ՌԴ արդյունաբերության և առևտրի նախարարի առաջարկությամբ կողմերը պայմանավորվել են փոքր և միջին ձեռնարկատիրությունների համատեղ նախագծերի ճանապարհային քարտեզ մշակել:
Ավելի ուշ հյուրերն այցելել են Ծիծեռնակաբերդի հուշահամալիր` հարգանքի տուրք մատուցելու Հայոց ցեղասպանության զոհերի հիշատակին: Նախարար Դենիս Մանտուրովը գրառում է թողել Ցեղասպանության թանգարանի հուշագրքում:
