Իրանի նախագահ Հասան Ռոուհանին հայտարարել է, որ Թեհրանը թույլ չի տա ԱՄՆ նորընտիր նախագահ Դոնալդ Թրամփին «խզել» միջուկային համաձայնագիրը, որը կնքվել է Իրանի ու համաշխարհային տերությունների միջև: Ելույթ ունենալով Թեհրանի համալսարանում`Ռոուհանին հայտարարել է, թե Թրամփը «մտադիր է շատ բան անել», սակայն, ըստ Ռոուհանիի, Թրամփի գործողությունները «չեն անդրադառնա» Իրանի վրա:
«Կարծում եք, ԱՄՆ-ն կարող է խզե՞լ Գործողությունների համապարփակ համատեղ ծրագիրը: Ըստ ձեզ, մենք թույլ կտա՞նք Թրամփին դա անել»,-ասել է Ռոուհանին` խոսելով 2015-ի հուլիսին Իրանի միջուկային ծրագրի սահմանափակման վերաբերյալ համաձայնագրի մասին, որի շրջանակում չեղարկվեցին Իրանի դեմ գործող պատժամիջոցները:
Թրամփը, որը ստանձնելու է պաշտոնը հունվարի 20-ին, նախընտրական արշավի ժամանակ Թեհրանի հետ պայմանավորվածությունը «սարսափելի» համաձայնագիր է անվանել, որը միայն Իրանին է օգուտ տվել: Ավելի ուշ նա ասել է, որ ՄԱԿ-ի կողմից ամրագրված պայմանագիրն այնքան էլ հեշտ չի լինի խզել: