Մեքսիկայի նախագահ Էնրիկե Պենիա Նիետոն կրկին հայտարարել է, որ իր երկիրը ոչինչ չի վճարելու ԱՄՆ հետ սահմանին պատի կառուցման համար:
Ավելի վաղ ԱՄՆ նախագահ Թրամփը հայտարարել էր, որ ԱՄՆ ներքին անվտանգության նախարարությունն անհապաղ կսկսի պատ կառուցել Մեքսիկայի հետ սահմանին: Նախապատրաստական միջոցառումները պետք է ավարտվեն 180 օրվա ընթացքում:
«Ես ափսոսում եմ և դատապարտում պատ կառուցելու որոշումը: Մեքսիկան չի հավատում պատերին, Մեքսիկան ոչ մի բան չի վճարի պատի համար»,-հայտարարել է Նիետոն իր հեռուստաեթերում, գրում է ՌԻԱ Նովոստին:
Նիետոն հիշեցրել է, որ այժմ ԱՄՆ-ում են գտնվում Մեքսիկայի ԱԳ նախարարն ու էկոնոմիկայի նախարարը: Նա հավելել է նաև, որ հրահանգել է ուժեղացնել իր հայրենակիցների պաշտպանությունն ԱՄՆ-ում: «Մեքսիկան կպաշտպանի և կսատարի իր քաղաքացիներին: Այնտեղ, որտեղ ռիսկ կա միգրանտների համար, որոնց աջակցություն է հարկավոր, այնտեղ էլ պետք է լինի մեր երկիրը»,-ասել է Նիետոն:
Իր վերջին հարցազրույցներից մեկում Թրամփը հաստատել է, որ սկզբում ԱՄՆ-ում պատ կկառուցեն Մեքսիկայի հետ սահմանին, իսկ հետո փոխհատուցում կպահանջեն հարևաններից: Ֆինանսավորման աղբյուրները նշված չեն:
Հունվարի 31-ին նախանշված է Թրամփի և Նիետոյի հանդիպումը Վաշինգտոնում: