Թուրքիան և Ռուսաստանը վերականգնել են հարաբերություններն ու այժմ աշխատում են տարածաշրջանային խնդիրների կարգավորման ուղղությամբ: Այդ մասին մարտի 21-ին հայտարարել է Թուրքիայի ԱԳ նախարար Մևլութ Չավուշօղլուն Վաշինգտոնի Մամուլի ազգային ակումբում:
«Մենք հաղթահարել ենք մեր տարաձայնությունները Ռուսաստանի հետ: Այսօր մեր հարաբերությունները վերականգնվել են և մենք գործակցում ենք տարածաշրջանի մի շարք խնդիրների կարգավորման հարցում»,-ասել է նա: Չավուշօղլուն որպես գործակցության օրինակ է բերել իրավիճակը Սիրիայում և Լեռնային Ղարաբաղում, գրում է ՏԱՍՍ-ը:
Միևնույն ժամանակ Չավուշօղլուն հավելել է, որ Անկարան շարունակում է «սատարել Վրաստանի և Ուկրաինայի տարածքային ամբողջականությանը, ներառյալ Ղրիմը»:
Ավելի վաղ Մոսկվայում կայացած ռուս-թուրքական բանակցությունների ժամանակ քննարկվել է ղարաբաղյան հակամարտությունը: Թուրքիայի նախագահ Ռեջեփ Թայիփ Էրդողանը, անդրադառնալով ղարաբաղյան կարգավորմանը, հայտարարել էր. «Այն, ինչ կատարվում է շփման գծում, ցույց է տալիս, թե որքան կրիտիկական է իրավիճակը և որքան մեծ է նոր պատերազմի ռիսկը Ադրբեջանի և Հայաստանի միջև»: Նա հավելել էր, որ ՌԴ-ն առանցքային դերակատարություն ունի հակամարտության կարգավորման գործում:
