Իսրայելահայ գործարար, Հայ-իսրայելյան առևտրի գրասենյակի փոխնախագահ, Teamnet packing and international freight services ընկերության ներմուծման և արտահանման հարցերով տնօրեն Սուրեն Շահնազարյանը մտադիր է ներդրումներ կատարել Հայաստանում՝ գյուղատնտեսության և արևային էներգիայի արտադրության ոլորտներում:
Գործարարն արձագանքել է ՀՀ սփյուռքի նախարար Հրանուշ Հակոբյանի նամակին:
Նախարարը, ընդունելով գործարարին, ողջունել է Հայաստանում ներդրումներ կատարելու նրա նախաձեռնությունը, հայտնում է սփյուռքի նախարարության մամուլի ծառայությունը:
Սուրեն Շահնազարյանը ներկայացրել է կազմակերպության, համայնքի գործունեությունն ու խնդիրները, պատրաստակամություն հայտնել ավելի սերտորեն համագործակցել նախարարության հետ, ակտիվորեն մասնակցել նախարարության ծրագրերին:
Ավելի վաղ հայտնի դարձավ, որ ԱՄԷ-ից Ocean Holding ընկերությունը ՀՀ արևային էներգիայի ոլորտում $100 մլն ներդրում կկատարի: Ընկերությունը ֆոտովոլտային կայաններ կկառուցի և կգործարկի՝ օգտագործելով ոլորտի լավագույն հասանելի տեխնոլոգիաները։
Նախարարությունը կդյուրացնի Ocean Holding-ի գործունեությունը Հայաստանում և կտրամադրի արևային էներգետիկայի ոլորտի մասին տեղեկատվություն։ Ներդրումները տեղի կունենան մի քանի փուլով։