Կառավարության ապրիլի 13-ի նիստում վարչապետ Կարեն Կարապետյանը հանձնարարել է գյուղատնտեսության ոլորտում ներկրվող ապրանքները փոխարինել տեղականով։
«Դրա համար պետք է խրախուսել տեղական արտադրությունը, մասնավորապես` հանքային և կենսաբանական պարարտանյութերի արտադրությունը, ինչպես նաև սերմնաբուծությունը», - նշել է Կարապետյանը, գրում է Aysor.am-ը:
Վարչապետը գյուղնախարարին հանձնարարել է մեկամսյա ժամկետում ներկայացնել սելեկցիոն կայանների ու սերմնաբուծությամբ զբաղվող կայանների գործունեության խթանման վերաբերյալ առաջարկություններ:
Կառավարության ղեկավարը հանձնարարել է ըստ անհրաժեշտության աշխատանքներում ներգրավել Հայաստանի ագրարային համալսարանի մասնագետներին:
Կարապետյանը ՀՀ տնտեսական զարգացման և ներդրումների նախարարին էլ հանձնարարել է ներդրումային ծրագիր ներկայացնել հանքային ու կենսաբանական պարարտանյութերի արտադրության վերաբերյալ։
«Այդ ոլորտը շատ շահութաբեր ու հասկանալի բիզնես է, ընթացքում խոսեք մասնավոր սեկտորի հետ: Չեմ կարծում, որ ներդրող չենք գտնի», - ասել է վարչապետը:
Տնտեսական տարվա գլխավոր նպատակները վարչապետ Կարեն Կարապետյանը հստակեցրել է կառավարության՝ 2017-ի առաջին նիստում: Ներկրվող ապրանքները փոխարինել տեղականով, կտրուկ ավելացնել արտահանումը:
