ՌԴ-ում Հայաստանի դեսպանատանն ապրիլի 12-ին «Ок Հայաստան» խորագրով միջոցառմանը ներկայացվել է ՀՀ զբոսաշրջային գրավչությունը:
Միջոցառումն ուղղված էր ՀՀ և ՌԴ զբոսաշրջության ոլորտների առանցքային ներկայացուցիչների միջև կապերի ամրապնդմանը, ինչպես նաև նոր համատեղ նախաձեռնությունների իրականացմանը, հայտնում է ՌԴ-ում ՀՀ դեսպանության մամուլի ծառայությունը:
Շնորհանդեսին մասնակցել է ՌԴ և ՀՀ տուրօպերատորների, կորպորատիվ միջոցառումների ներկայացուցիչների, հյուրանոցային համալիրների, զբոսաշրջային լրատվական կենտրոնների, ինչպես նաև հայ արտադրողների, ՌԴ առաջատար ավիափոխադրողների ավելի քան 100 ներկայացուցիչ:
Նշվում է, որ իր ելույթում ՌԴ-ում ՀՀ դեսպան Վարդան Տողանյանը կարևորել է զբոսաշրջության ոլորտում համագործակցության սերտացումը, այվ թում ՀՀ շահագրգիռ մարմինների և ՌԴ մասնավոր հատվածի միջև՝ անդրադառնալով նաև Հայաստանի զբոսաշրջային հնարավորությունների պատշաճ ներկայացմանը լրատվամիջոցներում:
Հյուրերի համար վիրտուալ շրջագայություն էր կազմակերպվել Հայաստանով, ներկայացվել են ՀՀ-ում կորպորատիվ զբոսաշրջության հնարավորությունները, ինչպես նաև հայկական ուտեստները:
Միջոցառման ավարտին խաղարկվել են ավիատոմսեր և Հայաստանում հանգստի զբոսաշրջային փաթեթներ:
