Իսպանիայի Կույերա քաղաքը ճանաչել է Հայոց ցեղասպանությունը: Այս մասին տեղեկացնում է Իսպանիայում Հայաստանի դեսպանության ֆեյսբուքյան էջը:

Քաղաքը միացել է Ցեղասպանությունը պաշտոնապես ճանաչած և դատապարտած իսպանական քաղաքների ցանկին:

Ավելի վաղ՝ ապրիլի 28-ին, Իսպանիայի Վիլյենա (Villena) քաղաքը պաշտոնապես ճանաչել է Հայոց ցեղասպանությունը՝ համալրելով այդ հանցանքը դատապարտած իսպանական մոտ երեք տասնյակ քաղաքների ցանկը:

Ապրիլի 27-ին Հայոց ցեղասպանության մասին բանաձև է ընդունել ԱՄՆ Կոլորադո նահանգի օրենսդիր մարմինը: Ըստ բանաձևի՝ Կոլորադոյում ապրիլի 26-ն այսուհետ Հայոց ցեղասպանության զոհերի հիշատակի օրն է լինելու:

Ապրիլի 25-ին Չեխիայի խորհրդարանի ստորին պալատը բանաձև է ընդունել, որով ճանաչում է Հայոց ցեղասպանությունը: Բանաձևը Չեխիայի խորհրդարան էր ներկայացրել Չեխիայի սոցիալ-դեմոկրատական կուսակցությունից պատգամավոր Ռոբին Բյոնիշը։ Բանաձևին կողմ է քվեարկել 104 պատգամավոր։