Արցախի «Հարսանիքը լեռներում» ՈՒՀԱ թիմը մայիսի 13-ին մեկնել է Ռուսաստանի Դաշնության մայրաքաղաք՝ մասնակցելու Մոսկվայի և Մերձմոսկվայի կենտրոնական լիգայի 1/4 եզրափակչին։
Թիմի ղեկավար Գեորգի Ավետիսյանը նշել է, որ տղաները շատ լուրջ են տրամադրված և փորձելու են անել հնարավորը՝ հաջորդ փուլի ուղեգիր նվաճելու համար: «Հուսով ենք՝ ամեն ինչ մեր սրտով կլինի, և մայիսի 17-ին բոլորս միասին ուրախանալու ավելի մեծ առիթ կունենանք»,- ասել է Արցախի ՈՒՀԱ թիմի ղեկավարը, հայտնում է Արցախպրեսը:
Նշենք որ քառորդ եզրափակիչը տեղի կունենա Մոսկվայում մայիսի 17-ին՝ Մոսկվայի ժամանակով ժամը 19։00-ին։
Մոսկվայի և Մերձմոսկվայի կենտրոնական լիգայի փառատոնին և 1/8 եզրափակչում «Հարսանիքը լեռներում» թիմը ճանաչվել է լավագույնը և ստացել նվեր-մրցանակ լիգայի գլխավոր հովանավորի կողմից։
Ավելի վաղ Ադրբեջանի ԱԳՆ-ն նոտա էր հղել Ռուսաստանին` պահանջելով պարզաբանումներ տալ Սոչիի ՈւՀԱ 28-րդ միջազգային փառատոնին ԼՂՀ-ից 2 թիմի մասնակցության կապակցությամբ: Այդ մասին հայտարարել է Ադրբեջանի ԱԳՆ ներկայացուցիչ Հիքմեթ Հաջիևը»:Ըստ Հաջիևի, Բաքուն դիմել է Մոսկվային` «խնդրելով օգտագործել իր ազդեցությունը` պարզություն մտցնելու համար» ԼՂՀ թիմերի մասնակցության հարցում:
Հունվարի 13-ին, Ադրբեջանի ԱԳՆ-վ դժգոհություն էր հայտնել այդ կապակցությամբ`«բողոք հայտնելով ԼՂՀ-ից «Աղ ու հացով» և DeleYaman թիմերի մասնակցության դեմ Սոչիի փառատոնին»: Ի պատասխան Հայաստանի խորհրդարանի փոխխոսնակ Էդուարդ Շարմազանովը հայտարարել էր, որ Ադրբեջանի արձագանքը Սոչիում «ԿիՎիՆ» փառատոնում Ստեփանակերտի թիմերի մասնակցությանը ոչ ադեկվատ է:
