Հուլիսի 11-ին Հայաստանում մեկնարկել է ՀԱՊԿ անդամ երկրների ՆԳՆ հատուկ նշանակության ուժերի ստորաբաժանումների հրամանատարական կազմի ուսումնամեթոդական հավաքը:
Վերոնշյալ ստորաբաժանումներն Արագ արձագանքման հավաքական ուժերի մաս են կազմում:
Ուսումնամեթոդական հավաքն անցկացվում է ՀԱՊԿ գլխավոր քարտուղարի տեղակալ Վալերի Սեմերիկովի ղեկավարությամբ, ասվում է ՀԱՊԿ պաշտոնական կայքում:
Վարժանքները կտևեն 3 օր ՀՀ ոստիկանության կրթահամալիրի բազայում:
«Հավաքի մասնակիցները գործնականում կմշակեն հատուկ գործողությունների անցկացման ժամանակ ուժերի և միջոցների գործարկման կարգը, օպերատիվ մարտական գործողությունների վարման եղանակների կատարելագործմանն ուղղված հարցերը, փորձի փոխանակում կլինի մարտական պատրաստության պարապմունքների անցկացման մեթոդների մասով»,-ասվում է հաղորդագրության մեջ:
Հավաքին մասնակցում են ՀՀ ոստիկանության, Բելառուսի, Ղրղզստանի և ՌԴ ՆԳՆ, ինչպես նաև Ղազախստանի Ազգային գվարդիայի և ՌԴ Ազգային գվարդիայի դաշնային ծառայության հատուկ նշանակության ստորաբաժանումների հրամանատարական կազմը: