Երևանի հասարակական տրանսպորտի զարգացումը ենթադրում է «Գազելների» վերացում, տրոլեյբուսային ցանցի զարգացում, մեծ ու միջին տարողությամբ ավտոբուսների գործարկում։ Այս մասին, «Ա1+»-ի հաղորդմամբ, հայտարարել է Երևանի փոխքաղաքապետ Վահե Նիկոյանը։ Երբ այս ամենը կյանքի կկոչվի՝ դեռ հայտնի չէ։ Հավանական ժամկետ է նշվում 2019 թվականը։
«Անելու ենք ամեն ինչ, որպեսզի տրանսպորտի սակագինը չբարձրանա»,- հայտարարել է փոխքաղաքապետը։
Հասարակական տրանսպորտի վարորդների համար կարող են չափոշոշիչներ մշակվել, աշխատավարձը կներառվի ուղետոմսի գնում։
Միաժամանակ հստակեցում չկա սակագների հարցում։ «Ազատության» հաղորդմամբ, Նիկոյանը հարցին ի պատասխան պատասխանել է, որ ձեռնարկվելու է ամենը սակագինը չփոփոխելու համար։
«Այս պահին նման հաշվարկ խորհրդատուի կողմից չենք ստացել, և բնական է, որ երթուղային ցանցի վերջնականացումից և չափորոշիչների սահմանումից հետո է միայն հնարավոր հաշվել այդ ցանցի իրագործման ծախսերը և որպես հետևանք՝ նաև ուղևորափոխադրման գինը», - նշել է նա։