Նախագահ Սերժ Սարգսյանն օգոստոսի 28-ին ընդունել է հունահռոմեական ըմբշամարտի ԱԱ-ում ոսկե մեդալներ նվաճած աշխարհի և Եվրոպայի եռակի չեմպիոն, Օլիմպիադայի ոսկե մեդալակիր Արթուր Ալեքսանյանին և աշխարհի չեմպիոն Մաքսիմ Մանուկյանին:
Հանդիպմանը ներկա են եղել նաև Հայաստանի հավաքականի գլխավոր մարզիչ Լևոն Ջուլֆալակյանը և սպորտի և երիտասարդության հարցերի նախարար Հրաչյա Ռոստոմյանը:
Հանրապետության նախագահը շնորհավորել է մարզիկներին փայլուն արդյունքներով հայրենիք վերադառնալու կապակցությամբ և շնորհակալություն հայտնել իրենց հաղթանակով ամբողջ ժողովրդին ուրախության և հպարտության պահեր պարգևելու, ինչպես նաև հայերին աշխարհում ավելի ճանաչելի դարձնելու համար:
Նախագահը կարևորել է նաև, որ հաղթանակած մարզիկներն օրինակ են դառնում երեխաների և այլ երիտասարդների համար, ովքեր ոգեշնչվում են, ձգտում նմանվել նրանց, դառնում էլ ավելի աշխատասեր ու նպատակասլաց:
Սերժ Սարգսյանը հանդիպման ժամանակ նախարար Հրաչյա Ռոստոմյանից և գլխավոր մարզիչ Լևոն Ջուլֆալակյանից հետաքրքրվել է հանրապետությունում ըմբշամարտի զարգացման համար առավել բարենպաստ պայմանների ստեղծման աշխատանքների ընթացքով և պատրաստակամություն հայտնել անհրաժեշտության դեպքում աջակցություն ցուցաբերել այդ աշխատանքները ժամանակին և պատշաճ իրականացնելու համար: