Մոսկվայի Դոմոդեդովո օդանավակայանում մաքսավորներն Աշխաբադից Մոսկվա ժամանած ուղևորի մոտից առգրավել են 1,6 մլն ռուբլի (մոտ $28.000) ընդհանուր արժեքով ոսկերչական իրեր: Այդ մասին սեպտեմբերի 18-ին հայտնել է գերատեսչության մամուլի ծառայությունը:
ՀՀ 36-ամյա քաղաքացին անցել է «կանաչ» միջանցքով, սակայն զննության ժամանակ նրա մոտ հայտնաբերվել է 9 ոսկերչական իր՝ մատանիներ, ականջօղեր, կախազարդեր, թևնոց և շղթաներ: Նա ասել է, որ զարդերը նվեր են կնոջը՝ որպես մոտավոր արժեք նշելով 6000 դոլարը, սակայն հաստատող փաստաթղթեր չի ներկայացրել, գրում է Lenta.ru-ն:
Մասնագետները ադամանդակուռ զարդերը գնահատել են մոտ 1,5 մլն ռուբլի:
«Ուղևորը պետք է հայտարարագրեր զարդերն ու անցներ «կարմիր» միջանցքով: 10.000 եվրոն գերազանցող անձնական սպառման իրեր ներմուծելու դեպքում ուղևորը պետք է լրացուցիչ մաքսատուրք վճարի, որը կազմում է ապրանքի արժեքի մոտ 30%-ը»,-ասել են մաքսատանը:
Զարդերի ապօրինի ներմուծման համար քաղաքացուն տուգանք է սպառնում: