Անհայտ անձինք, սպառնալով զենքով, խլել են Բրազիլիայի ֆուտբոլի հավաքականի դարպասապահ Ջեֆերսոնի ավտոմեքենան: Կողոպուտը տեղի է ունեցել, երբ «Բոտաֆոգոյի» ֆուտբոլիստը մարզման էր գնում Ռիո դե Ժանեյրո:
Փողոցներից մեկում նրա մեքենայի առջևում ավտոմեքենա է կանգնել, որից դուրս է վազել 3 հանցագործ և զենքի սպառնալիքի տակ պահանջել է ֆուտբոլիստից դուրս գալ մեքենայից և ծնկի իջնել՝ ձեռքերը վեր բարձրացրած: Դրանից հետո նրանք թողել են իրենց մեքենան և հեռացել հանցագործության վայրից ֆուտբոլիստի ավտոմեքենայով, գրում է eurosport-ը Esporte ao Minuto-ի վրա հղումով:
Ֆուտբոլիստը չի տուժել: Ավելի ուշ ոստիկանությունը հայտնաբերել է Ջեֆերսոնի մեքենան:
Ջեֆերսոնը Բրազիլիայի հավաքականի կազմում է հանդես գալիս 2010-ից: Նա 22 խաղի է մասնակցել և 11 գնդակ բաց թողել: