Ազգային ժողովը նոյեմբերի 15-ի առավոտյան նիստում ձայների 86 կողմ, 6 դեմ հարաբերակցությամբ երկրորդ ընթերցմամբ և ամբողջությամբ ընդունել է «Զինվորական ծառայության և զինծառայողի կարգավիճակի մասին» օրինագիծը:
Դեմ է քվեարկել ԵԼՔ ընդդիմադիր խմբակցությունը: Խմբակցության պատգամավոր Արարատ Միրզոյանը խորհրդարանականներին կոչ է արել դեմ քվեարկել նախագծին՝ ընդգծելով, որ դրա դեմ բողոքի ցույցեր են անցկացվում, 4 ուսանող հացադուլի մեջ է, 120 գիտաշխատող ևս դեմ է օրինագծին, հայտնում է «Ազատություն» ռադիոկայանը:
Համաձայն օրինագծի, որն առաջին ընթերցմամբ ընդունվել էր հոկտեմբերի 27-ին, տարկետում կստանան միայն այն քաղաքացիները, ովքեր պայմանագիր կկնքեն պաշտպանության նախարարության հետ և կպարտավորվեն ուսումն ավարտելուց հետո բանակում ծառայել արդեն երեք տարի ժամկետով: Հակառակ պարագայում նրանք 18 տարին լրանալուն պես երկու տարով կզորակոչվեն բանակ: