Գիտնականներին հաջողվել է պատմության մեջ առաջին անգամ մարդու հիշողությունը բարելավող իմպլանտ ստեղծել:
Newscientist կայքը գրում է, որ «հիշողության պրոթեզի» հեղինակներից է ԱՄՆ Կալիֆորնիայի համալսարանի մասնագետ Դոնգ Սոնը:
«Սա առաջին սարքավորումն է, որն ամրապնդում է մարդու հիշողությունը: Էլեկտրոդներից ստեղծված իմպլանտն ընդօրինակում է մարդու ուղեղի՝ հիշողությունը մշակելու գործընթացը», - կայքի փոխանցմամբ, ասել է Սոնը, որը սարքավորումն առաջին անգամ ներկայացրել է Վաշինգթոնում նյարդաբանների միության համաժողովի ընթացքում:
Իմպլանտը փորձակվել է մի քանի տասնյակ կամավորների հետ: Փորձարկումների արդյունքում պարզվել է, որ այն կարող է ընդհուպ մինչև 30%-ով բարելավել մարդու հիշողությունը: Գիտնականների խումբը նախատեսում է միևնույն մոտեցմամբ ուղեղի մյուս գործառույթները բարելավող սարքեր ստեղծել:
