Բրիտանացի երգիչ և երաժիշտ Ջեյմս Բլանտը 2018-ին առաջին անգամ համերգով հանդես կգա Վրաստանում: Համերգը տեղի կունենա մայիսի 26-ին Թբիլիսիի Միխայիլ Մեսխիի անվան մարզադաշտում Վրաստանի Անկախության օրվան նվիրված երաժշտական փառատոնի շրջանակում:
Ինչպես հայտնում են համերգի կազմակերպիչները, Բլանտը երգեր կկատարի իր վերջին Afterlove ալբոմից:
Վրաստանի Անկախության օրվան նվիրված երաժշտական փառատոնի շրջանակում հանդես կգան նաև հարավաֆրիկյան The Parlotones ինդի-խումբը Յոհանեսբուրգից, վրացական Young Georgian Lolitaz խումբը, ինչպես նաև Loudspeakers ռոք խումբը:
Փառատոնի տոմսերի վաճառքը մեկնարկել է դեկտեմբերի 1-ին: Տոմսերի արժեքը սկսվում է 120 լարիից՝ մոտ 43 դոլար:
Բրիտանացի երգիչ, երաժիշտ և երգերի տեքստերի հեղինակ Ջեյմս Բլանտը ծնվել է 1974-ի փետրվարի 22-ին բրիտանացի գնդապետ Չարլզ Բլանտի և նրա կնոջ Ջեյնի ընտանիքում: 2003-ին Բլանտը մեկնել է Կալիֆորնիա՝ ձայնագրելու իր առաջին ալբոմը Թոմ Ռոթրոքի հետ, որը Էլթոն Ջոնի պրոդյուսերն է: 2017-ի մարտին երգիչը թողարկել է իր 5-րդ The Afterlove ալբոմը: