Վրաստանի նախագահ Գեորգի Մարգվելաշվիլին հայտարարել է, որ մտադիր չէ ներում շնորհել պետության նախկին ղեկավար Միխայիլ Սահակաշվիլիին, որը հեռակա կարգով դատապարտվել է հայրենիքում: Այդ մասին Մարգվելաշվիլին հայտարարել է «Ռուսթավի 2» հեռուստաընկերությանը:
«Ի՞նչ տրամաբանությամբ ես պետք է ներեմ Սահակաշվիլիին: Դատախազությունը չի կարողանում որոշել, թե ինչպես մեղադրանքը ներկայացնել, քննությունը վարել, դատավորը չի կողմնորոշվում ներման մասին հոդվածի ապօրինի կիրառման սահմանների հարցում: Եվ ինչ՞, Վրաստանի նախագա՞հը պետք է ների Սահակաշվիլիին և դրանով իսկ շտկի նրանց սխալնե՞րը: Ներումը դա դատական սխալի շտկում չէ, դա այլ մարդու հանդեպ խղճահարության ակտ է»,-ասել է Վրաստանի նախագահը, գրում է ՌԻԱ Նովոստին:
Ըստ նախագահի, Սահակաշվիլին հիմնել է մի համակարգ, որն աշխատում, է մինչ օրս, և նոր իշխանությունները չկարողացան վերափոխել դա, ուստի, դատախազությունն ու դատարանը «գործում են հին ավանդույթներով»:
Ավելի վաղ Թբիլիսիի դատարանը հեռակա կարգով դատապարտել է Սահակաշվիլիին 3 տարվա ազատազրկման 2006-ին «Վրաստանի միավորված բանկի» աշխատակից Սանդրո Գիրգվլիանիի գործով: Նախկին նախագահը մեղավոր է ճանաչվել ծառայողական դիրքը չարաշահելու հոդվածով: Սահակաշվիլին ներում շնորհեց այդ գործի հետ կապված պաշտոնյաներին՝ դրանով իսկ ազատելով նրանց պատասխանատվությունից: Դրանից հետո Կիևում սկսեցին խոսել Սահակաշվիլիի հնարավոր արտահանձնման մասին:
