Իսրայելի առողջապահության նախարարության՝ Հայաստանում բժշկական կրթության ցածր որակի, ինչպես նաև արտասահմանցի ուսանողներին գումարի դիմաց դիպլոմ տալու նախադեպերի մասին հայտարարության կապակցությամբ ՀՀ-ում աշխատանքային խումբ է ստեղծվել: Այս մասին PanARMENIAN.Net ի հարցմանն ի պատասխան, հայտնեցին ՀՀ Կրթության և գիտության նախարարությունից:
Աշխատանքային խմբում ներգրավված են Հայաստանի կրթության և գիտության, արտաքին գործերի նախարարության և առողջապահության նախարարության ներկայացուցիչներ:
Նշվում է նաև, որ Իսրայելից ժամանած ներկայացուցիչներն աշխատանքային խմբի հետ այցելել են ուսումնական հաստատություններ՝ այդ թվում «Հայբուսակ» համալսարան:
««Հայբուսակում» ուսումնասիրվել է բժշկական մասնագիտություններով սովորող այն ուսանողների ուսումնառության գործընթացը, որոնց ստացած կրթությունը, ըստ Իսրայելի ներկայացուցիչների, չի բավարարում երկրում բժշկին ներկայացվող պահանջներին՝ մասնավորապես ուսման տևողությունը բավարար չէ մասնագետ դառանալու համար», - ասվում է հարցման պատասխանի մեջ:
Իսրայելական պատվիրակությունը հանդիպել է նաև «Հայբուսակում» սովորող թվով 100 իսրայելցի ուսանողների հետ և հետաքրքրվել նրանց՝ քննությունների ավարտից հետո Իսրայելում աշխատելու մտադրությունների և հնարավորությունների մասին:
Պայմանավորվածություն է ձեռք բերվել, որ իսրայելական կողմը կներկայացնի աշխատանքային խմբի ուսումնասիրությունների վերաբերյալ իր դիրքորոշումը, որից հետո, անհրաժեշտության դեպքում, կձեռնարկվեն համախատասխան միջոցառումներ:
Ավելի վաղ, Իսրայելի առողջապահության նախարարության պաշտոնական կայքէջում հրապարակվել էր տեղեկատվություն, համաձայն որի` Իսրայելի պետությունը չի երաշխավորում Հայաստանում բժշկական կրթություն ստացած շրջանավարտների աշխատանք գտնելու հնարավորությունը: Իսրայելի առողջապահության նախարարությունը դիմել էր երկրի իրավապահ մարմիններին՝ բողոքելով ՀՀ-ում բժշկական կրթություն ստացած և Իսրայելում աշխատող ատամնաբույժներից:
Իսրայելական ԶԼՄ-ների հաղորդմամբ, խոսքն Իսրայելի արաբական հատվածում աշխատող բժիշկների մասին է: