Հայտնի ֆրանսիացի բժիշկ Ֆրեդերիկ Սալդմանն, անդրադառնալով Ռիչարդ Զարզավաջյանի «Հայաստանի խոհանոցը» գրքին և բարձր գնահատելով այն, ուշադրությունը հրավիրում է հայկական խոհանոցի և առողջության համար վերջինիս օգտակար լինելու վրա, գրում է RTL-ը:
Սալդմանը ֆրանսիացի սրտաբան է և կանխարգելիչ բժշկության մասնագետ, «Առողջություն մինչև 120 տարեկան առանց դեղերի ու բժիշկների» գրքի հեղինակ:
«Մեծ խնդիրը, որ մենք ունենք սննդի պարագայում, այն է, որ մենք, որպես կանոն, անընդհատ նույն բանն ենք ուտում»,-ասել է Սալդմանը:
Ըստ նրա, առողջությունը պահպանելու համար անհրաժեշտ է բանջարեղեն ուտել, իսկ բազմազան բանջարեղենը սննդի մեջ նվազեցնում է պեստիցիդների մեծ քանակ օգտագործելու ռիսկը:
«Հայկական խոհանոցի մասին գրքում, որտեղ պարզ բաղադրատոմսեր են հավաքված, մենք հասկանում ենք, որ բանջարեղենից կարելի է իսկական ճաշատեսակներ պատրաստել: Կարծում եմ, մենք պետք է բացահայտենք մեզ համար այդ տնային բաղադրատոմսերը, քանի որ այնտեղ է առողջության բանալին»,-ասել է Սալդմանը:
