ՀՅԴ-ի Երևանի քաղաքային կոմիտեն դատապարտել է փետրվարի 13-ին Երևանի ավագանու նիստում «Երկիր ծիրանի» խմբակցության անդամների նկատմամբ կիրառված բռնությունը: Այս մասին ասվում է կոմիտեի հայտարարության մեջ:
«Անթույլատրելի է Երևան քաղաքում բազմաթիվ կենցաղային խնդիրների առկայությունը և դրանց նկատմամբ քաղաքապետարանի շարունակական անտարբերությունը, երբ այդ խնդիրները բազմիցս բարձրացվել են քաղաքացիների կողմից, իսկ դրանց լուծման ուղղությամբ որևէ տեսանելի քայլ չի արվել», - ասվում է հայտարարությունում:
Հայտարարության մեջ նշվում է նաև, որ աննպատակահարմար է քաղաքում գոյություն ունեցող խնդիրների «բեմականացված ներկայացումը» ավագանու նիստում:
«Խնդիրները ներկայացնելու առավել ընդունելի տարբերակներ կան, և կարծում ենք՝ այդ տարբերակները սպառված չեն: Սակայն դա ոչ մի ձևով չի արդարացնում ավագանու մեծամասության կողմից, մեղմ ասած, ոչ քաղաքակիրթ եւ մարդու իրավունքների բոլոր նորմերը խախտող վարքի դրսևորումները, որին ականատես եղանք բոլորս»,- նշվում է հայտարարության մեջ:
