Հայաստանից տարբեր ուղղություններով ավիատոմսերի գինը կնվազի 30.000 դրամով: Aysor.am-ի փոխանցմամբ, այս մասին հայտարարել է ՀՀ ԿԱ քաղաքացիական ավիացիայի գլխավոր վարչության պետ Սերգեյ Ավետիսյանը։
Նրա խոսքով, ներդրվելու է մեկ պատուհանի սկզբունքով գործող համակարգ, ինչը կնպաստի ավիատոմսերի գնի նվազմանը:
«Յուրաքանչյուր փոփոխություն բերում է նրան, որ հետաքրքրությունը դեպի հայկական ավիացիոն շուկա ավելանում է, տնտեսվարողներն ավելանում են, տրամաբանորեն ավելանում է նաև մրցակցությունը, և նվազում է տոմսի գինը», - ասել է Սերգեյ Ավետիսյանը։
Հայաստանի երկու օդանավակայանի ուղևորահոսքը 2018-ի հունվարին կազմել է 189.177 մարդ, ինչը 9,1%-ով գերազանցում է նախորդ տարվա նույն ամսվա ցուցանիշը: 2018 թվականի հունվար ամսին Երևանի «Զվարթնոց» օդանավակայանում ուղևորահոսքը կազմել է 178.301 մարդ՝ 5,7%-ով գերազանցելով նախորդ տարվա հունվար ամսվա ցուցանիշը:
«Զվարթնոց» և «Շիրակ» օդանավակայաններում 2018 թվականի հունվար ամսին, նախորդ տարվա նույն ամսվա հետ համեմատած, 11%-ով աճ են գրանցել նաև թռիչք-վայրէջքները: