Արցախի նախագահ Բակո Սահակյանը մարտի 26-ին անցկացրել է աշխատանքային խորհրդակցություն՝ Արցախի Հանրապետության ոստիկանության ղեկավար կազմի մասնակցությամբ:

Խորհրդակցությանը, մասնավորապես, անդրադարձ է կատարվել վերջերս Մարտունու շրջանում տեղի ունեցած միջադեպի հետ կապված հարցերին:

Երկրի ղեկավարին զեկուցվել է կատարված աշխատանքների եւ հարուցված քրեական գործի նախաքննության ընթացքի մասին:

Նախագահ Սահակյանը համապատասխան ցուցումներ է տվել մանրակրկիտ քննություն անցկացնելու, կատարվածին օբյեկտիվ գնահատական տալու եւ նմանատիպ երեւույթները հետագայում բացառելու նպատակով անհրաժեշտ միջոցներ ձեռնարկելու ուղղությամբ, հայտնում է Արցախի Հանրապետության նախագահի աշխատակազմի տեղեկատվության գլխավոր վարչությունը:

Փետրվարի 8-ին ժամը 22:00-ի սահմաններում Մարտունու շրջանի Ճարտար քաղաքում տեղակայված, նույն քաղաքի բնակիչ՝ 1987թ. ծնված Գ.Հ.ին պատկանող առևտրի սրահի դիմաց վիճաբանություն է առաջացել մի կողմից Մարտունի քաղաքի և Ճարտար քաղաքի բնակիչների միջև: Կողմերը հարվածներ են հասցրել միմյանց` պատճառելով տարբեր աստիճանի մարմնական վնասվածքներ ու ջարդելով նշված առևտրի սրահի պատուհանի ապակիները՝ խախտել հասարակական կարգը: Ընդհանուր առմամբ ծեծկռտուքին մասնակցել է 11 մարդ: