ՀՀ 3-րդ նախագահ, նախկին վարչապետ Սերժ Սարգսյանն առաջարկել է կուսակիցներին դիտարկել վարչապետի պաշտոնակատար Կարեն Կարապետյանի թեկնածությունը Հայաստանի Հանրապետական կուսակցության նախագահի պաշտոնում։
Այս մասին է հայտնում «Ինտերֆաքսը»՝ ՀՀԿ-ում իր աղբյուրներին հղում անելով։
Ապրիլի 25-ին տեղի էր ունեցել Ազգային ժողովի ՀՀԿ խմբակցության անդամների հանդիպումը պաշտոնաթող վարաչպետ Սարգսյանի և Կարապետյանի հետ:
Ըստ ՀՀԿ հաղորդագրության, Սարգսյանը ՀՀԿ խմբակցության անդամներին ավելի մանրամասն ներկայացրել է իր հրաժարականի պատճառները և խոսել Ազգային ժողովում աշխատելու տարբեր ձևաչափերի մասին` հորդորելով ամեն ինչում առաջնային նշանակություն տալ ներքին կայունությանն ու երկրի անվտանգությանը, ինչը ցանկացած որոշման դեպքում կարելի է իրականացնել միայն Հանրապետականի միասնության շնորհիվ։
Խմբակցության անդամները վարչապետի պաշտոնակատար Կարապետյանի հետ քննարկել են ներկա քաղաքական իրավիճակը և հնարավոր զարգացումները: Պայմանավորվածություն է ձեռք բերվել հայտարարելու, որ Հանրապետական խմբակցությունն առանց նախապայմանների պատրաստ է բոլոր կողմերի հետ քննարկել ցանկացած հարց:
