Հայտնի դերասան, ԽՍՀՄ ժողովրդական արտիստ Արմեն Ջիգարխանյանը մի քանի օր կանցկացնի հիվանդանոցում՝ մյուս շաբաթ նա արդեն կկարողանա թատրոն վերադառնալ: Այդ մասին հայտարարել է նրա ընկեր Արթուր Սողոմոնյանը՝ հերքելով լուրերն այն մասին, թե դերասանը կոմայի մեջ է:
Ավելի վաղ ԶԼՄ-ներում հաղորդագրություններ տարածվեցին բժշկական աղբյուրների վրա հղումով, թե Ջիգարխանյանը շտապ հոսպիտալացվել է և կոմայի մեջ է: Սողոմոնյանը հայտարարել է, որ Ջիգարխանյանը հոսպիտալացվել է, քանի որ թուլություն էր զգում, սակայն, նրա վիճակը նորմալ է, հայտնում է ՌԻԱ Նովոստին:
«Առաջին հետազոտությունները կրիտիկական խանգարումներ չեն հայտնաբերել, սակայն, կան որոշակի խնդիրներ: Առաջիկա մի քանի օրը նա կմնա հիվանդանոցում: Հուսով եմ՝ հաջորդ շաբաթ կկարողանա թատրոն վերադառնալ»,-ասել է Սողոմոնյանը:
Մոսկվայի Կունցևոյի շրջանի դատարանը հաստատել է հայտնի դերասան և ռեժիսոր, ԽՍՀՄ ժողովրդական դերասան Արմեն Ջիգարխանյանի և նրա երիտասարդ կնոջ՝ Վիտալինա Ցիմբալյուկ-Ռոմանովսկայայի ապահարզանի մասին որոշումը: Նախորդ որոշումը բողոքարկել էին Ցիմբալյուկ-Ռոմանովսկայայի իրավաբանները:
Ավելի վաղ մեծ սկանդալ բռնկվեց 82-ամյա դերասանի և նրա 38-ամյա կնոջ՝ Վիտալինա Ցիմբալյուկ-Ռոմանովսկայայի շուրջ, որը սկսվեց նրանից, որ հոկտեմբերի 10-ին Ջիգարխանյանը հայտնվեց հիվանդանոցում: Հոսպիտալացումից հետո նա հայտարարեց, որ մտադիր չէ այլևս ապրել կնոջ հետ, իսկ Ցիմբալյուկ-Ռոմանովսկայան, որը զբաղեցնում էր Ջիգարխանյանի թատրոնի տնօրենի պաշտոնը, հրաժարական տվեց և հայտարարեց, որ բաժանվում է ամուսնուց: Ավելի ուշ Ցիմբալյուկ-Ռոմանովսկայային մեղադրանք ներկայացվեց անձնական կյանքի գաղտնիությունը խախտելու հոդվածով:
