ՀՀ ոստիկանապետի պաշտոնում նշանակվել է Երևանի փոխոստիկանապետ Վալերի Օսիպյանը: Այդ մասին վարչապետ Նիկոլ Փաշինյանն ասաց ֆեյսբուքյան ուղիղ եթերում:
«Մտածեցի, որ հեղափոխությունից առաջ, մենք դուք ու Վալերի Օսիպյանը գտնվում էինք փշալարերի տարբեր կողմերում: Այս որոշումից հետո բոլորս պետք է նույն կողմում հայտնվենք», - ասաց Փաշինյանը:
Բացի այդ, Փաշինյանը տեղեկացրեց, որ ԱԱԾ տնօրենի պաշտոնում նշանակվել է ԱԱԾ Երևանի քաղաքային վարչության բաժնի պետ, փոխգնդապետ Արթուր Վանեցյանը:
«Հայաստանի Հանրապետության քաղաքացիները պետք է շատ արագ տեսնեն Ոստիկանության և ԱԱԾ փոփոխությունների արդյունքները», - եզրափակեց վարչապետը:
Ավելի վաղ ՀՀ ոստիկանապետ Վլադիմիր Գասպարյանն ու ԱԱԾ տնօրեն Գեորգի Կուտոյանն ազատվել էին պաշտոններից ՀՀ նախագահ Արմեն Սարգսյանի համապատասխան հրամանագրերի համաձայն, որոնց առաջարկն արել էր վարչապետ Փաշինյանը:
