14 մայիսի 2018 - 13:56 AMT
Նաիրի Պետրոսյան. Սերժ Սարգսյանն ապրիլին արտակարգ դրության հարց չի քննարկել

ՀՀ երրորդ նախագահ Սերժ Սարգսյանն ապրիլին, վարչապետի պաշտոնը զբաղեցնելու օրերին, երկրում արտակարգ դրություն սահմանելու հարց չի քննարկել: Այդ մասին իր ֆեյսբուքյան էջում հայտնել է Սարգսյանի գրասենյակի ղեկավար Նաիրի Պետրոսյանն՝ արձագանքելով Reuters-ում հրապարակված հոդվածին։

«Որպես Հայաստանի Հանրապետության երրորդ նախագահ Սերժ Սարգսյանի գրասենյակի ղեկավար կցանկանայի հայտնել Մարգարիտա Անթիձեին (Reuters-ում հոդվածի հեղինակ), որ 2018-ի ապրիլին Հայաստանում ծավալված իրադարձությունների ժամանակ Սերժ Սարգսյանը չի քննարկել արտակարգ դրություն սահմանելու հարցը: Արտերկրի առաջնորդներից ոչ մեկի հետ», - ասվում է գրառման մեջ:

Reuters-ը դիվանագիտական աղբյուրի վրա հղումով գրել էր, թե Ապրիլի 23-ին իր հրաժարականի մասին հայտարարելուց 24 ժամ առաջ Հայաստանի վարչապետի պաշտոնը ստանձնած Սերժ Սարգսյանըհեռախոսազրույցներ է ունեցել Ռուսաստանի պաշտոնյաների հետ: Այդ 24 ժամվա ընթացքում Սերժ Սարգսյանն ակտիվ քննարկումներ է ունեցել իր թիմի անդամների և պաշտոնյաների հետ: Նրանք քննարկել են երկրում արտակարգ դրություն հայտարարելու հնարավորությունը, ինչն ավելի լայն իրավունքներ կտար ուժային կառույցներին ցուցարարների դեմ պայքարում, գրել է թերթը:

Ապրիլի 23-ին ՀՀ երրորդ նախագահ Սերժ Սարգսյանը հրաժարական տվեց ապրիլի 17-ին ստանձնած վարչապետի պաշտոնից երկրում ընթացող բազմամարդ բողոքի ակցիաների և քաղաքացիական անհնազանդության ֆոնին: Մայիսի 8-ին ԵԼՔ խմբակցության ղեկավար, ընդդիմության առաջնորդ և ՀՀ վարչապետի միակ թեկնածու Նիկոլ Փաշինյանն ԱԺ-ում ընտրվեց Հայաստանի վարչապետ: