Սահմանադրական դատարանը երբեք որևէ քաղաքական ուժի հետ չի համագործակցում, Սահմանադրական դատարանը իրականացնում է իր գործառույթները: Այդ մասին հայտարարել է ՀՀ Սահմանադրական դատարանի նախագահ Հրայր Թովմասյանը՝ պատասխանելով ՀՀ վարչապետ Նիկոլ Փաշինյանի հետ համագործակցության մասին հարցին։
Թովմասյանի խոսքով՝ այն սահմանադրությունը, որի մշակմանն ինքը մասնակցել է, արժանացել է և հայաստանյան, և միջազգային հեղինակավոր կազմակերպությունների բարձր գնահատականին և այս ժամանակահատվածում դեռևս որևէ խնդիր չի առաջացել, հայտնում է Panorama.am-ը:
Անդրադառնալով այն հարցին, թե արդյոք պատրաստվում է հրաժարական տալ՝ ՍԴ նախագահը պատասխանել է, որ նման մտադրություն չունի։
Խոսելով այն մասին, թե Վահե Գրիգորյանին տեսնում է դատարանի կազմում, Հրայր Թովմասյանն ասել է. «Ես տեսնում եմ յուրաքանչյուրին, ով կստանա ազգային ժողովի պատգամավորների առնվազն երեք հինգերորդի աջակցությունը: Ես որպես Սահմանադրական դատարանի նախագահ ունեմ զրո ազդեցություն՝ որոշելու, թե ով պետք է լինի Սահմանադրական դատարանի դատավորը»։
Հրայր Թովմասյանն ընտրվել է Սահմանադրական դատարանի նախագահ 2018-ի մարտի 21-ին Ազգային ժողովում փակ գաղտնի քվեարկությամբ: Թովմասյանի թեկնածությունն այդ պաշտոնում առաջադրել էր ԱԺ նախագահ Արա Բաբլոյանը:
