Հունիսի 6-ին ՌԴ արտգործնախարար Սերգեյ Լավրովի հրավերով Հայաստանի ԱԳ նախարար Զոհրաբ Մնացականյանը աշխատանքային այցով կմեկնի Մոսկվա:
Այս մասին հայտնում է ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունը:
Այցելության ընթացքում նախատեսվում են Զոհրաբ Մնացականյանի հանդիպումներն ԱԳ նախարար Սերգեյ Լավրովի, Պետական Դումայի պատգամավորների և Դաշնային Խորհրդի սենատորների հետ:
Նախարարները կարծիքներ կփոխանակեն ղարաբաղյան հակամարտության կարգավորման շուրջ։ Բանակցությունների ընթացքում նախատեսվում է քննարկել նաև երկկողմ համագործակցության հարցերի լայն շրջանակ՝ ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի մայիսի 14-ին Սոչիում կայացած հանդիպման արդյունքների ամփոփման համատեքստում: Նախատեսվում է հատուկ ուշադրություն դարձնել միջազգային խնդիրներին, այդ թվում ինտեգրման գործընթացներին ԵՏՄ, ՀԱՊԿ և ԱՊՀ շրջանակներում, գործողությունների համակարգմանը ՄԱԿ, ԵԱՀԿ, ՍԾՏՀ և այլ միջազգային հարթակներում:
Հայաստանի արտաքին քաղաքական գերատեսչության ղեկավարը կհանդիպի Մոսկվայում կրթություն ստացող հայ ուսանողների հետ:
