Ճանապարհային ոստիկանության ծառայողները շարժական տեսաձայնագրող կամ լուսանկարահանող տեխնիկական միջոցներ չեն օգտագործի ճանապարհային երթևեկության խախտումներն արձանագրելիս: Համապատասխան որոշման նախագիծն ընդգրկված է կառավարության հունիսի 15-ի նիստի օրակարգում:
Նշվում է, որ ճանապարհային ոստիկանության ծառայողները ճանապարհային երթևեկության անվտանգությունն ապահովելիս չեն ապահովում «Ոստիկանության մասին» օրենքի 22-րդ հոդվածի 4-րդ մասով սահմանված` շարժական տեսաձայնագրող կամ լուսանկարահանող տեխնիկական միջոցներով ոչ գաղտնի վերահսկողության մասին ոստիկանության ծառայողի կողմից բանավոր նախազգուշացնելու սահմանված պահանջը:
«Փաստորեն, խախտման փաստի արձանագրումը տեղի է ունենում առանց սուբյեկտի համաձայնության, ինչը չի բխում «Անձնական տվյալների պաշտպանության մասին» օրենքի 16-րդ հոդվածի պահանջներից», - նշվում է նախագծում:
2017-ին, ԱԺ էր ներկայացվել «Ոստիկանության մասին» օրենքում փոփոխությունների նախագիծը, որով նախատեսվում էր հանցագործությունները բացահայտելիս, հասարակական կարգը և երթևեկության անվտանգությունը պահպանելիս ոստիկանության ծառայողներին թույլատրել տեսաձայնագրող կամ լուսանկարահանող սարքեր օգտագործել: Այն բուռն քննարկումների տեղիք էր տվել:
