Լոռու փոխմարզպետ, «Քաղաքացիական պայմանագիր» կուսակցության անդամ Անդրեյ Ղուկասյանը լրագրողների հետ զրույցում հայտարարել է, որ ԲՀԿ-ական մարզպետ Հրանտ Մարգարյանը չարաշահում է պաշտոնեական դիրքը, նա կոչ է արել իրավապահ մարմիններին զբաղվել այդ հարցով, գրում է «Հայկական ժամանակ» օրաթերթը:
Ղուկասյանը մասնավորապես ասել է, որ մարզպետը ստիպել է Սպիտակի բժշկական կենտրոնի տնօրենին հրաժարականի դիմում ներկայացնել, փոխարենը այդ պաշտոնում ցանկանալով նշանակել ԱԺ «Ծառուկյան» խմբակցության պատգամավոր Վանիկ Ասատրյանի փեսային:
«Կա ինֆորմացիա, որ մարզպետն ու առողջապահության վարչության պետը այցելել են բուժհիմնարկներ, մասնավորապես՝ Սպիտակի բժշկական կենտրոն, որտեղ տեղի է ունեցել խորհրդակցություն բժիշկների և տնօրենի հետ, հետագայում խնդրել են տնօրենին դուրս գալ, ու առանձնազրույց են ունեցել աշխատողների հետ: Կան տվյալներ, որ փորձել են ճնշել տնօրենին, որպեսզի նա հրաժարական տա, այնուհետ տեղը նշանակվի ԱԺ «Ծառուկյան» խմբակցության պատգամավոր Վանիկ Ասատրյանի փեսան»,- հայտարարեԼ Է փոխմարզպետը:
Ղուկասյանը նշել է, որ նմանօրինակ կասկածներ կան դպրոցների տնօրենների հետ կապված:
«Հրավիրվում են խորհրդակցություններ, հետո լրատվամիջոցներին դուրս են հրավիրում, թաքուն գաղտնի բան են զրուցում, դա ևս անընդունելի է», - ասել է նա:
Ղուկասյանը նշել է, որ դեմ է՝ մարզում կուսակցական գործունեություն տանելուն, ապա հայտնել է, որ ենթադրում է՝ մարզպետի կողմից նմանատիպ քայլեր արդեն արվում են:
